അമ്മ മരിച്ചുപോയെന്നും പറഞ്ഞ് പരിശോധന ഒഴിവാക്കി തിരക്കിട്ട് പോകാൻ ശ്രമം; കൊച്ചിയിൽ ലക്ഷങ്ങൾ വിലവരുന്ന സ്വർണ്ണം ഒളിപ്പിച്ചു കൊണ്ടുവന്ന യുവതി കസ്റ്റംസ് പിടിയിൽ
കൊച്ചി വിമാനത്താവളത്തിൽ 25.75 ലക്ഷം രൂപയുടെ സ്വർണ്ണംകടത്താൻ ശ്രമിച്ച യുവതി കസ്റ്റംസ് പിടിയിൽ. ബഹറിനിൽ നിന്ന് ഇൻഡിഗോ വിമാനത്താവളത്തിൽ എത്തിയ ആലപ്പുഴ സ്വദേശിനിയായ രജുലയാണ് 518 ഗ്രാം സ്വർണ്ണം കടത്താൻ ശ്രമിക്കുന്നതിനിടെ പിടിയിലായത്.
കസ്റ്റംസ് ഡ്യൂട്ടി ടൈം മാറുന്ന നേരത്താണ് ഇവർ എത്തിയത്. അമ്മ മരിച്ചുപോയതിനാൽ കാണാൻ എത്തിയതാണെന്ന് പറഞ്ഞ് പരിശോധന ഒഴിവാക്കി ഗ്രീൻ ചാനലിലൂടെ കടന്നുപോകാൻ ആയിരുന്നു ശ്രമം. തിരക്ക് കൂട്ടി ഗ്രീൻ ചാനലിലൂടെ കടന്നുപോകാൻ ശ്രമിച്ചതോടെ ഇവരുടെ നടത്തത്തിൽ സംശയം തോന്നിയതിനാൽ ആണ് കസ്റ്റംസ് പിടികൂടിയത്.
പിന്നീട് നടത്തിയ വിശദമായ പരിശോധനയിലാണ് സ്വർണം കണ്ടെത്തിയത്. ഷൂസിനുള്ളിലാണ് ഇവർ 275 ഗ്രാം സ്വർണ്ണ മിശ്രിതം ഒളിപ്പിച്ചു വച്ചിരുന്നത്. ഇത് കൂടാതെ 253 ഗ്രാം തൂക്കം വരുന്ന 5 വളകളും ഒരു മാലയും ഇവർ ഇവർ ധരിച്ചിരുന്നതായും കണ്ടെത്തി.
മരണവുമായി ബന്ധപ്പെട്ട് വിദേശത്തുനിന്ന് വരുന്നവരെ കൂടുതൽ പരിശോധന കൂടാതെ ഗ്രീൻ ചാനലിലൂടെ കടത്തിവിടാറുണ്ട്. ഇത് മുതലാക്കിയാണ് ഇവർ തിരക്ക് കൂട്ടി സ്വർണ്ണം കടത്താനായി ശ്രമിച്ചത്.
