ചിട്ടി പിടിച്ച് സ്വന്തമാക്കിയ 45000 രൂപയും അമ്മയുടെ മരുന്നുകളും എ ടി എം കാർഡുകളും അടങ്ങിയ ബാഗ് മോഷ്ടിച്ചു; ഭിന്നശേഷിക്കാരനായ കച്ചവടക്കാരനോട് ക്രൂരത
കോട്ടയത്ത് പെട്ടിക്കട കച്ചവടക്കാരനിൽ നിന്ന് പണം നിറച്ച ബാഗ് കവർന്നു. രമേശനെ കബളിപ്പിച്ച മോഷ്ടാവ് ഏറെ നാളായി ചിട്ടി വച്ച് സ്വന്തമാക്കിയ 45,000 രൂപയും രോഗിയായ അമ്മയുടെ മരുന്നും കൊണ്ടുപോയി. കാട്ടുരുത്തി സർക്കാർ സ്‌കൂളിന് സമീപത്തെ വഴിയോര പെട്ടിക്കടയിൽ ലോട്ടറി ടിക്കറ്റ് നടത്തുന്ന ഭിന്നശേഷിക്കാരനായ കെ.കെ.രമേശന്റെ ബാഗാണ് മോഷ്ടാവ് മോഷ്ടിച്ചത്.
ജീവിതത്തിലെ വെല്ലുവിളികളോട് പോരാടി അതിജീവനത്തിനായി കഠിനാധ്വാനം ചെയ്യുന്ന ഭിന്നശേഷിക്കാരനോടാണ് കള്ളന്റെ കണ്ണില്ലാത്ത ക്രൂരത. കഴിഞ്ഞ ദിവസം കട തുറന്ന രമേശൻ പണം നിറച്ച ബാഗ് കടയിൽ വച്ച് ലോട്ടറി ടിക്കറ്റ് വിൽക്കാൻ റോഡിലേക്ക് ഇറങ്ങുകയായിരുന്നു. ലോട്ടറി കച്ചവടം കഴിഞ്ഞ് വൈകിട്ട് കടയിൽ തിരിച്ചെത്തിയപ്പോഴാണ് ബാഗ് നഷ്ടപ്പെട്ടത്.
ചിട്ടി പിടിച്ച 45,000 രൂപയ്ക്ക് പുറമെ രോഗിയായ അമ്മയ്ക്കുള്ള മരുന്നുകളും രണ്ട് എടിഎം കാർഡുകളും മോഷ്ടിച്ച ബാഗിൽ ഉണ്ടായിരുന്നതായി കെ കെ രമേശൻ പറയുന്നു. രമേശൻ നൽകിയ പരാതിയുടെ അടിസ്ഥാനത്തിൽ മോഷ്ടാവിനെ കണ്ടെത്താൻ അന്വേഷണം ആരംഭിച്ചതായി കാട്ടുരുത്തി പൊലീസ് അറിയിച്ചു. പ്രദേശത്തെ സിസിടിവികൾ കേന്ദ്രീകരിച്ച് പൊലീസ് അന്വേഷണം ആരംഭിച്ചു.
