കാണാതായ യുവതിയെയും കുഞ്ഞിനെയും കണ്ടെത്തി; യുവാവിനൊപ്പം സ്വമേധയാ പോയതെന്ന് യുവതിയുടെ മൊഴി
തിരുവല്ലയിൽ നിന്ന് കാണാതായ യുവതിയെയും കുഞ്ഞിനെയും കണ്ടെത്തി. ഇന്ന് ഉച്ചയ്ക്ക് 12 മണിയോടെ കാറിൽ സഞ്ചരിക്കവെ തിരുവല്ല സിഐ ബി.സുനിൽ കൃഷ്ണന്റെ നേതൃത്വത്തിലുള്ള പോലീസ് സംഘമാണ് ഇവരെ പിടികൂടിയത്. യുവതിയുടെ ഭർത്താവ് ഭാര്യയെയും കുട്ടിയേയും തട്ടിക്കൊണ്ടുപോയെന്ന് പരാതിപ്പെട്ടിരുന്നു. യുവതിയുടെ കൂടെ ചെങ്ങന്നൂർ സ്വദേശി പ്രിന്റു പ്രസാദും (32) ഉണ്ടായിരുന്നു. സ്വമേധയാ പ്രിന്റുവിനൊപ്പം പോയെന്ന് യുവതി പോലീസിന് മൊഴി നൽകി.
തിങ്കളാഴ്ച രാത്രി 11 മണിയോടെയാണ് തിരുമൂലപുരം ജംക്ഷനു സമീപം കാറിലെത്തിയ നാലംഗ സംഘം ഭർത്താവിനൊപ്പം ബൈക്കിൽ വീട്ടിലേക്കു മടങ്ങുകയായിരുന്ന 23കാരിയെയും കുഞ്ഞിനെയും തട്ടിക്കൊണ്ടു കടത്തിക്കൊണ്ടു പോയത്. തട്ടുകടയിൽ നിന്ന് ഭക്ഷണം കഴിച്ച് ബൈക്കിൽ മടങ്ങുമ്പോൾ കാറിലെത്തിയ സംഘം ബൈക്കിന് കുറുകെ കാർ തടഞ്ഞുനിർത്തി യുവതിയെയും മൂന്ന് വയസുകാരിയെയും കടത്തിക്കൊണ്ടു പോയത്. ഭർത്താവ് സന്ദീപ് സന്തോഷ് നൽകിയ പരാതിയിൽ പ്രിന്റു പ്രസാദിനെതിരെ തിരുവല്ല പൊലീസ് കേസെടുത്ത് നടത്തിയ അന്വേഷണത്തിലാണ് ഇവരെ കണ്ടെത്തിയത്.
