ചുമരിൽ ചാരി കുഞ്ഞിനെ മുലയൂട്ടുന്നതിനിടെ ഇടിമിന്നലേറ്റു; ആറ് മാസം പ്രായമായ കുഞ്ഞും അമ്മയും തെറിച്ച് വീണു
വീടിന്റെ ചുമരിനോട് ചേർന്ന് കുഞ്ഞിനെ മുലയൂട്ടുന്നതിനിടെയാണ് അമ്മക്ക് ഇടിമിന്നലേറ്റു. പൂമംഗലം സ്വദേശി ഐശ്വര്യ(36)യ്ക്കാണ് ഇടിമിന്നലേറ്റത്. ഇന്നലെ വൈകിട്ട് ഏഴുമണിയോടെയാണ് സംഭവം. ഇടിമിന്നലിൽ തെറിച്ചുവീണ ഐശ്വര്യയും കുട്ടിയും അബോധാവസ്ഥയിലായി. സംഭവത്തിൽ കുഞ്ഞിന് പരിക്കില്ല. യുവതിക്ക് കേൾവിശക്തി നഷ്ടപ്പെട്ടു.
ഇടിമിന്നലിൽ ഐശ്വര്യയ്ക്ക് പൊള്ളലേറ്റു. അവരുടെ തലമുടി കരിഞ്ഞിട്ടുണ്ട്. ഇടിമിന്നലേറ്റ സമയത്ത് യുവതിയുടെ മാതാപിതാക്കളും മറ്റ് രണ്ട് കുട്ടികളും വീട്ടിലുണ്ടായിരുന്നുവെങ്കിലും പരിക്കേറ്റില്ല. ഐശ്വര്യയും കുഞ്ഞും ഇരിങ്ങാലക്കുട സഹകരണ ആശുപത്രിയിൽ ചികിത്സയിലാണ്.
ഇരുവരുടെയും ആരോഗ്യനില തൃപ്തികരമാണെന്ന് ഡോക്ടർമാർ അറിയിച്ചു. ഇടിമിന്നലിൽ വീട്ടിലെ സ്വിച്ച് ബോർഡുകളും ബൾബുകളും വലിയ ശബ്ദത്തോടെ പൊട്ടിയതായി ഐശ്വര്യയുടെ ഭർത്താവ് സുബീഷ് പറഞ്ഞു. ഇടിമിന്നലിൽ സമീപത്തെ വീടുകൾക്കും കേടുപാടുകൾ സംഭവിച്ചിട്ടുണ്ട്.
